ريهام و باسم ...... لية الخصام
ريهام: نفسي نفضل يومين على بعض من غير خناق أو خصام، أنا والله بحب "باسم" قوي ومش متخيلة حياتي من غيره لكن مش عارفة ازاي بازعله مني.
كل حاجة بتحصل فجأة وتقوم خناقة بيني وبينه والمشكلة إنها بتكون على حاجات هايفة جدا ومش سبب خالص إننا نتخاصم أو نزعل من بعض
أنا عارفة إنه بيحبني وعمل المستحيل علشان يتجوزني بس خايفة كتر زعلنا وخصامنا يقضي على الحب اللي بينّا
أنا فعلا مش باكون عايزة أزعله ومتأكدة إن دي كمان مشاعره، واحنا الاتنين بنكون متضايقين قوي واحنا بعيد عن بعض، لكن فعلا مش لاقيين حل للخلافات اللي بتحصل بينّا صحيح مابنقدرش نتخاصم كتير لكن الخلافات بتتكرر ونرجع نصالح بعض ونرجع نتخاصم تاني، وأنا مش عايزة ده يحصل ومش عايزة يكون في بينّا خصام خالص.. يا ترى ده ممكن ولا أمنية بعيدة مش ممكن تتحقق
باسم: أنا مش مصدق.. بعد سنتين ارتباط وثلاث سنين خطوبة كنا فيها أسعد اتنين ماكنتش متصور إن ممكن ييجي يوم زي ده والخلافات تتطور بيني وبينها لدرجة إن مافيش واحد فنا طايق التاني.. حقيقي مش عارف ازاي ده حصل، بس هي السبب.. هي اللي خلتني أتنرفز عليها، كنت متضايق من قلة الفلوس وقعدت أشتكي ليها إن ظروفنا المادية مش كويسة لأني عارف إني مقصر في حقها وإن أكيد لها طلبات بتخبيها ومش بتقولها علشان ماتزعلنيش وتحملني فوق طاقتي، فإذا بيها بتقول حلول غريبة جدا أولها إنها تنزل تشتغل وهي عارفة إن شرطي الوحيد عليها قبل ما نتجوز إنها تبطل شغل وهي وافقت رغم حبها لشغلها، لأنها اتأكدت إن أنا خايف عليها من البهدلة ومش عايز أتحكم فيها..
وقعدنا نتكلم شوية في الاقتراح ده وهي حاولت تقنعني بوجهة نظرها، لكن أنا كنت رافض المبدأ أصلا، فبدل ما تسكت أو حتى تقول ولو بالكذب إن مش ناقصها حاجة وإنها سعيدة معايا على الحال ده راحت قالت لي "بشبه نرفزة": "خلاص دور إنت على شغل تاني"، وهنا قعدنا نتخانق بجد، فهي عارفة إن أنا بانزل من 7 صباحا ومش بارجع غير الساعة 5، أشتغل إيه تاني؟ هو حد دلوقتي لاقي شغل واحد لما يلاقي اتنين خصوصا إن أنا مرتبي مش بطال وممكن يعيشنا كويس، يبقى أبهدل نفسي في شغل تاني ليه، فإذا بيها بتقول لي: "يووه زهقتني مش عارفة أرضيك ازاي، ومفيش حل عجبك.. أنا خلاص زهقت"
ريهام : أنا مش قادرة أستوعب إن "باسم" يعمل كده ويقول الألفاظ دي.. حتى دموعي مش عايزة تنزل.. أنا فعلا مصدومة ومش عارفة أنا غلطت في إيههو قعد يشتكي من قلة الفلوس وإننا مش عارفين نتفسح ونخرج مع بعض زي أيام الخطوبة، أنا حسيت إن هو بيلومني أو بيؤنبني على مصاريفنا وإنه مش عارف يشيل فلوس زي الأول علشان مصاريفنا كتير، خصوصا إنه متغير بقاله فترة وفترات سكوته بقت أطول من الأول، وبصراحة أنا عارفة إن أنا متدلعة شوية وإيدي سايبة حبتين، لكن ده مش معناه إنه يقول اللي قاله، خصوصا إن أنا متعودة على طريقة حياة معينة وعرضت عليه أنزل أشتغل فعلا وهو اللي مارضيش.. طيب أنا كنت أعمل له إيه يعني؟!
مشكلة "ريهام" و"باسم" بتتكرر كتير قوي بين أي اتنين بيحبوا بعض فعلا وكل واحد فيهم شايف في التاني حبه الوحيد والدائم لكن بتحصل بينهم خلافات في وجهات النظر ومشكلات بتخليهم يفتكروا إن الحب اللي بينهم ناقصه حاجة أو مش كامل أو إن فيه "حاجة غلط"
يعني مش كوننا زعلنا مع بعض في حاجة خلاص كده بقينا أعداء أو طرفي نقيض، وكل واحد يحاول يركز جهوده ليثبت إن التاني هو اللي غلطان، وإن وجهة نظره هي الصحيحة لأن ممكن بمنتهى البساطة نوصل لحل من خلال الفهم والاستيعاب المتبادل لوجهة نظر كل واحد، وإن وجهة نظرنا احنا الاتنين ممكن تكون صح لأنها في النهاية بتهدف لاستمرار الحياة بشكل يرضينا احنا الاتنين مش واحد على حساب التاني، وإن كل واحد يعرف إن الحياة مش هتكون "حلوة" لو التاني زعلان أو فيه حاجة مضايقاه
يعني لازم نتفق إن لو فيه حالة حب حقيقية واحترام واحتياج بين الطرفين فده ممكن يخلي أي خلاف بدل ما يؤدي لفجوات وانفصال يؤدي إلى المزيد من الاتفاق والاقتراب، وبالتالي مزيد من الحب.
من حقك ان تسمع و من واجبي ان أتكلم
حب بعقل وخاصم ايضا بعقل
الغضب ممنوع والزعل مرفوع
حبيبك بشر فلا تكون معة الملاك البرىء المعصوم من الخطاء
المزاج
العمل/الترفيه